प्रधानमन्त्री डा. बाबुराम भट्टराई (@brb_laaldhwoj) ट्विटरमा हिट

प्रधानमन्त्रीको फेक ट्विटर एकाउन्टबारे बहस भएको दुईहप्ता पछि नै, प्रधानमन्त्री डा. बाबुराम भट्टराई ट्विटरमा छिर्नुभएको छ । नेपालका प्रधानमन्त्री डा. बाबुराम भट्टराईको ट्विटर प्रवेश सँगै नेपाली ट्विटरजगत बाबुराममय भएकोछ । भट्टराईको पक्ष र विपक्षमा ट्विटहरु बर्सीरहेकाछन् । प्रारम्भिक अध्ययन अनुसार, भट्टराईले ट्विटरमा नकारात्मक टिप्पणी धेरै झेल्नु परेकोछ । 

१४ ट्विट ११ फलोइङ्ग

यो ब्लग तयार गर्दा सम्म भट्टराईले १४ वटा ट्विट गर्नुभएकोछ भने ११ जनालाई फलो गर्नुभएकोछ ।

रिट्विटको बाढी

डा. भट्टराईका सबै ट्विट लगातार रिट्विट भइरहेकाछन् । ट्विटोनोमीको अनुसार यो ब्लग तयार   गर्दासम्म भट्टराईको १४ वटा ट्विट करिब नौ सय उनान्चालिस (९३९) पटक रिट्विट भएकाछन् ।

१३०० मेन्सन

सोसल एनलाइटिक्स टप्सीका अनुसार हालसम्म डा. भट्टराईलाई करिब तेह्रसय (१३००) मेन्सन गरिएकोछ । (प्रोटेक्टेड ट्विटको गणना गरिएकोछैन, साथै टाइमजोनमा भएको फरकका कारण मिती तलको ग्राफमा फरक देखिएकोछ।)

सबैभन्दा धेरै फलोअर नेपालबाट

फलोअरओङ्कका अनुसार भट्टराईका करिब पैँतालिस सय (४५००) फलोअर मध्ये करिब २ हजार फलोअर नेपालबाट रहेकाछन् । मेरो अनुमानमा यो सङ्ख्या करिब ३ हजारको हाराहारीमा हुनुपर्ने हो, तर ट्विटर प्रयोगकर्ता सबैले आफ्नो बायोमा स्थान उल्लेख नगर्ने तथा लोकेशन सर्भिस अफ राख्ने भएका कारण, यही नै हो भनेर किटान गर्नसक्ने अवस्था भनेछैन ।

नयाँ ट्विटर प्रयोगकर्ता बढे

डा. बाबुराम भट्टराईले ट्विटर चलाउन थालेको खबर सँगै, ट्विटरका नयाँ प्रयोगकर्ताहरु थपिएकाछन् । यो हप्ता मात्रै करिब सात सय (७००) जनाले ट्विटरमा नयाँ खाता खोलेर, भट्टराईलाई फलो गर्नथालेकाछन् ।

पुरुष फलोअर धेरै

डा. भट्टराईका अधिकांश फलोअरहरु पुरुष रहेकाछन् । ट्विटरबाट महिला र पुरुष नछुट्टिने भएपनि, प्रयोगकर्ताहरुले गरेका ट्विट, लिंक, बायो आदि विभिन्न सिग्नलहरुलाई लिएर फलोअरओङ्कले निम्न नतिजा दिएकोछ । फलोअरओङ्कका अनुसार, भट्टराईका फलोअर मध्ये करिब पच्चिस प्रतिशत पुरुष र तिन प्रतिशत महिला रहेकाछन्। यो तथ्याङ्कले ठ्याक्कै नभन्ने भएपनि, महिला भन्दा धेरै पुरुषहरु ट्विटरमा रहेछन् भन्ने जनाउदिन्छ ।

लोडसेडिङ घट्ने ट्विट सर्वाधिक रिट्विट

१४ वटा ट्विटहरु मध्ये, “लोडसेडिङ आजबाट २ घन्टाले घट्छ” भनेर गरिएको ट्विट सर्वाधिक रिट्विट गरिएकोछ ।

भेरिफाइड ट्विटर एकाउन्ट ?

स्वकिय सचिव विश्वदिप पाण्डेले भनेको आधारमा डा. भट्टराईको ट्विटरलाई आधिकारिक मानिएकोछ । यद्यपी भट्टराईको एकाउन्टमा ट्विटरको भेरिफाइड ब्याच नभएकोले, भट्टराईको एकाउन्ट हो कि हैन भनेर शंका मान्नेहरु पनि धेरै नै छन् । केही प्रयोगकर्ताहरु भने भेरिफिकेसन गर्न कदम चाल्नुपर्यो भनेर सल्लाह दिइरहेका पनि छन् । टप्सीका अनुसार अधिकांश प्रयोगकर्ताले भट्टराईलाई ‘ट्विटर भेरिफाइ’ गर्न सुझाउँदै ट्विटर भेरिफिकेसनको यो सपोर्ट पेज लिंक मेन्सन गरेकाछन् ।

बुझ्नुपर्ने कुरा के हो भने, ट्विटरमा कसलाई भेरिफाइड ब्याच दिने नदिने भन्ने कुरा ट्विटरको आफ्नै बुझाइमा भर पर्दछ । पपुलर व्यक्तिहरु, सेलिब्रेटिहरु, सरकारी अधिकारी तथा सरकारी कार्यालयहरु, संघसंस्था आदिहरुलाई ट्विटरले आफ्नै हिसाबले भेरिफाइड ब्याच दिने गर्छ । (गतवर्ष मिडिया मुगल रुपर्ट मर्डकको श्रीमतीको रुपमा आएको फेक ट्विटर एकाउन्टलाई पनि ट्विटरले भेरिफाइड ब्याच दिएका कारण, गतबर्ष ट्विटरको फेरिफाइड गर्ने शैलीमा धेरैले औँलो उठाएका थिए ।) ट्विटरको नजर भट्टराईको एकाउन्टमा पर्यो भने, भेरिफाइड ब्याच ट्विटरले दिनसक्ला, तर ट्विटरमा ट्विटरलाई मेन्सन गरेर भेरिफाइड ब्याच चाहियो भन्दैमा केही हुँदैन, जब की भट्टराईको प्रोफाइल नै अपुरो छ ।

भट्टराईको ट्विटर प्रोफाइल अपुरो

भट्टराईको प्रोफाइल अपुरो रहेका कारण जो कोहीले भट्टराईको ट्विटर एकाउन्ट “फेक” हो कि भनेर शंका गर्नु स्वभाविक हो । केहीले विश्वदिपको फेसबुक पोस्ट हेरे होलान्, ट्विट पनि हेरे होलान् केही ब्लग र न्युज पोर्टलमा नि पढे होलान् तर पाँचौ हजार व्यक्तिहरु शंका लाग्दा लाग्दै पनि सक्कली प्रोफाइल हो रे, भनेर “रे” का कुरामा पछि लागेकाछन् ।

भट्टराईको ट्विटर युजरनेम (@brb_laaldhwoj) मा धेरै कमेन्ट नगरौँहोला, तर पनि अझ सरल र अन्डरस्कोर रहित युजरनेम छानेको भए राम्रो हुनेथियो, खैर युजरनेम जे राखेपनि फरक पर्दैन । भट्टराई थर राख्न चाँहि हतार गरेजस्तो देखिन्छ, सानो बि “b” को प्रयोग गरेको अलि अमिल्दो देखिएकोछ ।

भट्टराई को हुन्, के गर्छन्, कहाँ छन् यी केही कुराहरु ट्विटरमा खुलाइएकोछैन । अत: ट्विटरलाई भेरिफाइ गर्नलाउ भन्नुभन्दा पहिले भट्टराईलाई नै बायो राख्न सुझाउनुपर्छ । डा. भट्टराईले बायोमा आफ्नो परिचय स्पष्ट रुपमा राख्न जरुरी छ । भट्टराईको आफ्नो व्यक्तिगत साइटको लिंक, अनि स्थान प्रस्ट रुपमा लेख्न जरुरी छ । साथै, आफैँले आफ्नो ट्विटर पहिले भेरिफाइ गर्न जरुरी छ । भट्टराईले आफ्नो ट्विटरको लिंक आफ्नो व्यक्तिगत साइटमा राखेर आफ्नो एकाउन्टलाई भेरिफाइ गर्न सक्छन् । भट्टराईको व्यक्तिगत साइटमा ट्विटरको लिंक राखेपछि, जो कोहीले भट्टराईको असली ट्विटर एकाउन्ट हो भनेर भन्नसक्छन् ।

जहाँसम्म लाग्छ, यो प्रधानमन्त्री कार्यालयको भन्दा पनि डा भट्टराईको आफ्नो व्यक्तिगत एकाउन्ट हो, यसर्थ हालको लागि यो प्रधानमन्त्री डा. बाबुराम भट्टराईको ट्विटर एकाउन्ट हो । भट्टराईको एकाउन्टबाट कसले ट्विट गर्छ, कसले ट्विट टाइप गर्छ भन्नु भन्दा पनि यो भट्टराईको आधिकारिक ट्विटर हो भनेर बुझ्नुपर्छ, र त्यहाँबाट आएका सम्पूर्ण ट्विटहरुको जिम्मेवारी डा. भट्टराईले लिनुपर्छ । भारतका प्रधानमन्त्री डा मनमोहन सिंह तथा अमेरिकी राष्ट्रपति बाराक ओवामाको ट्विटरमा भएको कुरालाई हामीले सकरात्मकरुपमा लिएका छौँ, अत: डा भट्टराईको ट्विटरमा भएको उपस्थितिलाई हामीले सकरात्मकरुपमा लिनुपर्छ । उनले गरेका ट्विट तथा कामहरुलाई कसरी लिने भन्ने कुरा अलग कुरा हो । भारतका प्रधानमन्त्री मनमोहन सिंहले चलाउने ट्विटर भारतको प्रधानमन्त्री कार्यालयको ट्विटर हो भने, अमेरिकाका राष्ट्रपति बाराक ओवामाले प्रयोग गर्ने ट्विटर उनको व्यक्तिगत ट्विटर हो । अत: भट्टराईको ट्विटर एकाउन्टलाई पनि हामीले प्रधानमन्त्रीको व्यक्तिगत ट्विटर हो भनेर बुझ्नुपर्ने हुन्छ । भट्टराई देशका प्रधानमन्त्री भएका कारण, ट्विट गर्दा शब्द चयन देखि लिएर ट्विटको मर्म सोचेर मात्र गरेर ट्विट गर्नुपर्छ ।

फलोअर ?

भट्टराईका करिब ५ हजार ट्विटर फलोअर छन् । तर यसो भन्दैमा भट्टराई प्रति आस्था राख्ने वा माओवादी प्रति आस्था राख्ने फलोअरहरु भनेर, फलोअरहरुको गलत ब्याख्या भने गरिनुहुँदैन । भट्टराईलाई फलो गर्ने सबैका आ-आफ्नै कारण र प्रायोजन हुनसक्छन् ।

(नोट: माथिका डाटाहरु फलोअरओङ्क, टप्सी, ट्विटोनमी, ट्विटर आदिबाट लिइएको हो । डाटाहरु फरक पर्नसक्नेछन्, तर पनि वास्तविकताको धेरै नजिक भने रहेकाछन् ।)