Republic of Nepal

लामो प्रतिक्षा पछि २०६५ जेठ १५ गते रातको करिब ११:२२ बजे नेपाल गणतन्त्र राज्य भएको घोषणा गरिएकोछ । बैठक बिहान दिनको ११ बजे बस्ने भनिएको भएपनि दलहरु बिच सहकार्य हुन नसक्दा अनि राष्ट्रपति को बारेमा सहमति हुन नसक्दा बिहान बस्ने भनिएको बैठक दिउँसो ३, बेलुका ६ भन्दै राती ९ बजे सुरु भएको थियो । यसै बैठकलाई लक्षित गरेर खुलामञ्च मा दिउँसो एउटा तथा बेलुका बिआइसिसि मा दुईवटा बम बिस्फोट गराइएको थियो । बिस्फोटन को जिम्मा रणविर सेनाले लिएको छ ।

आज बैठक बस्ने भनिएकोले बिहानैदेखि गणतन्त्र को पक्षमा नारा जुलुस भएको थियो भने ठाउँ-ठाउँमा खुशियाली मनाउँदै विविध साँस्कृतिक कार्यक्रमहरु गरिएको थियो । धेरै शंका र उपशंका विच गणतन्त्र घोषणा भएको छ । प्रधानमन्त्रि गिरिजा प्रसाद कोइराला ले पेश गरेको गणतन्त्र को प्रस्ताव को पक्ष मा ५६० मत तथा विपक्षमा ४ मत परेको थियो । अब नेपाल गणतान्त्रिक राज्य बन्ने कुरा मा शंका नरहेपनि, कार्यान्वायन पक्षको बारेमा केही भन्न नसकिने स्थिति छ । दलहरु कसरी अगाडि जाने हुन्, सहमति को कुरा कहिलेसम्म राम्रो हुने हो, यी यावत कुराहरु मा अहिले नै केही भन्न नसकिएपनि, नारायणहिटिलाई संग्राहलय बनाउने भइएकोछ भने ज्ञानेन्द्रलाई दरबार छोड्न १५ दिन को म्याद दिने बताइएको छ ।

केही दृश्यहरु शब्दमा:
- घन्टि बज्यो, बाहिर भएका सभासदहरु पनि भित्र आए
- केवि गुरुङले बैठक को अध्यक्षता गरे, ज्ञात-अज्ञात शहिदहरु प्रति मौनधारणा गरियो
- प्रधानमन्त्रि गिरिजा प्रसाद कोइराला को प्रवेश
- कोइराला ले सहिद प्रति श्रद्दान्जलि व्यक्त गर्दै, आफ्नो र राष्ट्र को सपना आज को दिन साकार भएको कुरा व्यक्त गरे
- कोइराला व्दारा एक युग मा एक चोटि आउने दिन आजै भएको बताए
- कोइरालाको लिखित वक्तव्य रामचन्द्र पौडेल ले पढेर सुनाए
- भारतिय लोक सभा का अध्यक्षको पत्र केवि गुरुङले पढेर सुनाए
- गृहमन्त्रि कृष्ण प्रसाद सिटौला ले निर्णयार्थ केहि प्रस्तावहरु राखे
- सिटौला ले प्रस्ताव राखिरहँदा, हृदयश त्रिपाठीले "संघिय" शब्द छुटेको भन्दै सच्याउन भने
- गणतन्त्र को प्रस्तावमा भोटिङ गरियो
- प्रतिभा राणा, चन्द्र बहादुर गुरुङ, चित्र बहादुर के सि, प्रकाशचन्द्र लोहनी आदिले आफ्ना केही असहमतिहरु जनाए
- गणतन्त्रको पक्षमा ५६० मत र विपक्षमा ४ मत परेको घोषणा गर्दै पहिलो बैठक को समापन भएको घोषणा गरियो
- अर्को बैठक जेठ २३ गते बस्ने कुरा सार्वजनिक गरियो

फरक प्रसंङ्ग:
- प्रधानमन्त्रि प्रचण्ड र बाबुराम भट्टराई सँग हात मिलाउँदै चाँडै बाहिर निस्के
- बैठक सुरु हुनु अगावै जस्तो राप्रपा नेपाल का चन्द्रबहादुर गुरुङ केही भन्न खोज्दैथिए, केवि गुरुङले पछि समय दिने बताए
- बिच-बिच मा केही दृश्यहरु कमेडि लाग्थे, जस्तो कि केवि गुरुङ ले "कटु सत्य" भन्नुपर्ने मा कटु मा धेरै जोड दिँदै "कट्टु सत्य" भनेका थिए, हलमा नजानिँदो हाँसो फैलिएको थियो
- बेला-बेला मा केवि गुरुङ अलमल मा परेका देखिन्थे
- माइकहरु पर्याप्त नभएको हो या, प्रयोग मा नल्याइएको हो, सभासदहरुले बोल्न माइक खोजी गरिएको थियो
- केही सभासदहरु निदाइरहेका देखिन्थे
- बिआइसिसि बाहिर बम पड्काएको आशंका मा दुईजनालाई प्रहरीले नियन्त्रण लियो
- पछि फेरी एकै बाइक मा सबार भएर हुँकिएका ३ जनालाई पनि प्रहरीले नियन्त्रण मा लिएको छ
- सडकमा मान्छेहरुको उपस्थिति बाक्लो छ
- प्राय: सबै नेपाली टिभि च्यानल तथा रेडियोहरुले कार्यक्रम को प्रत्यक्ष प्रसारण गरेका थिए भने ब्लग तर्फ माइसंसार ले विश्वव्यापी रुपमा कार्यक्रमको प्रत्यक्ष प्रसारण गरेको थियो

दायित्व:
हामीसबै नेपाली को काँधमा एउटा ठूलो दायित्व आएको छ, देश बनाउने । आशा छ सबै राम्रैको लागि हुनेछ अनि हामी गणतान्त्रिक राज्य नेपाल का अनुशासित जनता भएर शान्तिपुर्वक जिवनयापन गर्दै देशलाई विकास तर्फ अग्रसर गराउने छौँ । देश का लागि जिवन उत्सर्ग गर्ने ज्ञात अज्ञात शहिदहरुप्रति हार्दिक श्रद्धासुमन अर्पण गर्दै, नयाँ गणतान्त्रिक नेपाल को हार्दिक मंगलमय शुभकामना व्यक्त गर्दछु ।