नेपालमा थ्रिडि एनिमेसन च्यालेन्ज आयोजना हुँदै #3DChallenge

माया एनिमेसन एकेडेमी को पहल मा नेपाल मा पहिलो पल्ट पाँच लाख रुपैँया पुरस्कार राशी भएको  ‘थ्रिडि एनिमसेन च्यालेन्ज २०११’ को आयोजना गर्न लागिएको छ । काठमाडौँ मा आयोजित एक समारोह का बिच कार्यक्रम को जानकारी दिइएको हो ।

संसार भरिका चलचित्रहरु मा एनिमेसन को प्रयोग बढ्दो रुप मा भइरहेको अनि नेपालमा पनि एनिमेटरहरु रहेको तर पनि नेपाल ले एनिमेसन को क्षेत्रमा खासै उपलब्धी हासिल गर्न नसकेको कारण, ‘थ्रिडि एनिमेसन च्यालेन्ज’ को आयोजना गर्न लागिएको हो ।

नेपालको पहिलो छोटो एनिमेसन चलचित्रहरूको प्रतियोगिता  भनिएको च्यालेन्ज मा  नेपाली तथा नेपालका कुनै पनि क्षेत्रिय भाषामा २ मिनट देखि ८ मिनट अवधिको एनिमेटेड चलचित्र निर्माण गर्न सकिनेछ ।

नेपाल चलचित्र बिकास बोर्ड संचालक समितिका अध्यक्ष अमर गिरीको प्रमुख आतिथ्यमा आयोजित सो समारोहमा अध्यक्ष गिरीद्वारा वान फिल्म थ्री-डी एनिमेसन च्यालेन्जको अफिसियल वेवसाईट 1film3d.maya-animation.com सार्वजनिक गर्नुभएको थियो ।

वरिष्ठ एनिमेटर करुण थापाले एनिमेसनमा २ दशकको अवधिमा पनि नेपालले केही उल्लेखनिय प्रगति गर्न नसकेकोमा चिन्ता प्रकट गर्दै यस प्रतियोगिताले नेपाली एनिमेटरहरुलाई संगठित हुन सहयोग पुग्ने बताउनु भएको थियो ।

वरिष्ठ पत्रकार, आदिवासी जनजाति चलचित्र महासंघका सदस्य एवं वान फिल्म थ्री-डी एनिमेसन च्यालेन्ज, प्रकाशन कमिटीका सदस्य विजय रत्न तुलाधरले नेपालमा पहिलो पटक आयोजना हुन लागेको यस प्रतियोगितामा विभिन्न क्षेत्रिय भाषाका लोक कथा तथा लोक संस्कृतिलाई एनिमेटेड गर्न ती क्षेत्रिय भाषाका प्रवर्द्धक संस्थाहरुले एनिमेटरहरूलाई सघाउ पुर्याउनु पर्ने बताए ।

च्यालेन्ज का सम्बन्ध मा हामीलाई प्राप्त भएको प्रेस विज्ञप्ति यस प्रकार छ ।

“One Film 3D Animation Challenge 2011 : Press Release” [Nepal’s First 3D Animation Short Film Competition]

माया एनिमेसन एकेडेमीका तर्फबाट यहाँहरु माझ “वान फिल्म थ्री-डी एनिमेसन च्यालेन्ज” को घोषणा गर्न पाउँदा गौरव महशुस भइरहेको छ । विश्वव्यापी रूपमा थ्री-डी एनिमेसन उद्योगले लिदै गरेको उचाँईको बारेमा अब हामी कोही अनभिज्ञ रहेनौ । अहिले करिब २१० बिलियन डलर एनिमेसन उधोगमा लगानी रहेको छ । प्रिभिजुलाइजेशन देखि पोष्ट प्रोडक्सन सम्म साधारण प्रोमो देखि ईन्जिनियर, डाक्टर सम्म; कला, बिज्ञान जहिँतहिँ कम्प्युटर ग्राफिक्सको प्रयोग बढ्दो छ । छिमेकी मुलुक भारतकै सन्दर्भ केलाउने हो भने पनि एनिमेसन ब्यापार निकै बिस्तार भइसकेको छ ।

नेपालमा पनि यो क्षेत्रको निम्ति प्रचुर सम्भावनाहरू रहेका छन् । नेपाली युवा एनिमेटरहरूमा रहेको प्रशस्त ऊर्जा र उत्साहका कारण थाहै नपाई नेपाली युवा एनिमेटरहरू पनि समुद्रपारका एनिमेसन उत्पादन कम्पनीहरूका निम्ति राम्रा छनौट बन्न थालेका छन् । त्यसैले थ्री-डी एनिमेसन मार्फत आफ्नो कैरियरलाई ‘ग्लोबल टच’ दिने नेपाली युवाहरूको व्यक्तिगत जमर्को आफैमा सर्‍हानिय छ । थुप्रै सम्भाव्यताहरू रहेको यस क्षेत्रलाई उनीहरुको व्यक्तिगत प्रयासका भरमा मात्र छोड्नु भन्दा योजनाबद्ध रूपमा यस क्षेत्रलाई अघि बढाउने हो भने नेपाली युवा, समाज र देशले प्रशस्त फाइदा लिन सक्ने देखिन्छ र यसका निम्ति संस्थागत पहल आवश्यक छ । त्यही आवश्यकतालाई दृष्टिगत गर्दै माया एनिमेसन एकेडेमीले गर्न लागेको एउटा प्रयास हो – “वान फिल्म थ्री-डी एनिमेसन च्यालेन्ज २०११” । नेपालको पहिलो छोटो एनिमेसन चलचित्रहरूको प्रतियोगिता ।

विविध लोक संस्कृति र लोक कथाले भरिएको देश – नेपाल । नेपाल जस्तो कला र सिर्जनात्मकताले समृद्ध देशमा छोटो एनिमेटेड चलचित्रहरुको प्रतियोगिता आफैमा आशा लाग्दो काम ठहर्छ । आशा राख्न सकिन्छ नेपाली थ्री-डी एनिमेसन चलचित्रले विश्व सामु नेपाल चिनाउने एउटा अर्को पाटो उजागर गर्नेछ ।

नेपालको एक मात्र ‘अटोडेस्क आधिकारिक ट्रेनिङ्ग सेन्टर’ माया एनिमेसन एकेडेमीले आयोजना गर्न लागेको थ्री-डी एनिमेसन च्यालेन्जमा संसारका जुनसुकै कुनामा रहेका नेपाली एनिमेटरहरुले भाग लिन पाउनेछन् । नेपाली तथा नेपालका कुनै पनि क्षेत्रिय भाषामा निर्माण गरिएका २ मिनट देखि ८ मिनट अवधिको एनिमेटेड चलचित्र निर्माणका लागि प्रतिस्पर्धिहरुले यही फेब्रुअरी २८ (फाल्गुण १६ गते) भित्रमा नाम लेखाउन सक्नेछन्। रजिष्ट्रेशनका लागि प्रति चलचित्र रजिष्ट्रेशन शुल्क एक हजार रुपैंया तोकिएको छ ।

रजिष्ट्रेशन पश्चात करिब साढे छ महिनाको अवधिमा चलचित्र तयार पारि बुझाउनु पर्नेछ । यस बिच बिभिन्न एनिमेसन गुरु, कम्प्युटर ग्राफर, समिक्षक तथा चलचित्रबिज्ञहरुको सहभागितामा चलचित्र कार्यशाला तथा अन्तरक्रिया कार्यक्रमहरु आयोजना गरिनेछ, जसले चलचित्रको गुणवत्ता सुधारका निम्ति सहभागिहरुलाई ठूलो सहयोग मिल्ने विश्वास लिएका छौं ।

राजधानि स्थित कुमारी क्युएफएक्स सिनेमामा अक्टोबर १७ (असोज ३० गते) देखि अक्टोबर २१ (कार्तिक ४ गते) सम्म ति चलचित्रको प्रदर्शन गरिनेछ । चलचित्रको मौलिकता (बिषयवस्तु एवं लेखन) , थ्री-डी प्रोडक्सन (क्यारेक्टर एनिमेसन, क्यामेरा प्रस्तुति, सट कम्पोजिसन) , पोष्ट प्रोडक्सन (सम्पादन, ट्रान्जिसन, पेसिङ्ग, कन्टिन्युटी तथा फ्लो) ईमेज क्वालिटी (फोकस, कलर तथा लाइटिङ्ग) तथा साउण्ड क्वालिटी (ध्वनिको मधुरता तथा पृष्ठभुमी संगीत) लाई आधार मानेर थ्री-डी एनिमेसन गुरु, थ्री-डी स्टुडियो एवं प्रोडक्सन कम्पनि तथा चलचित्रविज्ञहरुको निर्णायक मण्डलको निर्णय तथा दर्शकहरुको एसएमएस भोटिङ्गका आधारमा उत्कृष्ट चलचित्रको घोषणा हुनेछ ।

नेपालमा पहिलो पटक आयोजना हुन गइरहेको छोटो एनिमेसन चलचित्रहरुको यस प्रतियोगितामा धेरै भन्दा धेरै नेपाली एनिमेटरहरुको सहभागिताको आशा राखेका छौं । हामीलाई बिश्वास छ, “वान फिल्म थ्री-डी एनिमेसन च्यालेन्ज” ले नेपाली एनिमेटरहरुका निम्ति आफ्नो दक्षता प्रदर्शनको चुनौती पस्कने एउटा ‘प्लेटफर्म’ प्रदान गर्ने मात्र होईन नयाँ-नयाँ अवसर र ज्ञान आर्जनको थुप्रै सम्भाव्यता पनि प्रदान गर्नेछ ।

नेपाली एनिमेसन क्षेत्रकै निम्ति एउटा चुनौतिका रुपमा रहेको यस ‘च्यालेन्ज’ को प्रतिस्पर्धि चलचित्रहरुमा उत्कृष्ट ठहरिएको एक चलचित्रलाई नोभेम्बर ५ (कार्तिक २१ गते) का दिन एक विशेष समारोह बीच रु. पाँच लाख नगद सहित ‘वान फिल्म थ्री-डी एनिमेसन अवार्ड’ प्रदान गरिनेछ । साथै उक्त चलचित्र लाई ‘अन्तराष्ट्रिय एनिमेटेड चलचित्र महोत्सव’ मा समेत प्रतिस्पर्धाका लागि पठाइनेछ।

धन्यवाद,

रमेश मान श्रेष्ठ

कार्यक्रम संयोजक

२०६७ माघ १७ गते सोमबार