सोसल नेटवर्किङ साइट लिङ्क्डइन २६ खर्बमा बिक्री

माइक्रोसफ्टले, ४३ करोड प्रयोगकर्ता रहेको प्रोफेशनल सोसल नेटवर्किङ साइट लिङ्क्डइन २६ अर्ब डलरमा (करिब २६ खर्ब नेपाली रुपैँया) किन्ने घोषणा गरेको छ । माइक्रोसफ्टका अनुसार, लिङ्क्डइन छुट्टै (आफ्नै) ब्रान्डको रुपमा रहनेछ । अहिलेका लिङ्क्डइनका सिईओ जेफ विनर नै माइक्रोसफ्ट अन्तरगत रहने लिङ्क्डइन सिईओको रुपमा रहनेछन् ।

माइक्रोसफ्ट प्रोफेशनल क्लाउड र लिङ्क्डइन प्रोफेशनल नेटवर्क भएको उल्लेख गर्दै, लिङ्क्डइनका सिइओ जेफ विनरले माइक्रोसफ्टसँग मिलेर अझै धैरै काम गर्न सकिने कुरा आफ्नो ब्लगमा उल्लेख गरेकाछन् । लिङ्क्डइनका सिइओको ब्लगमा आएका कमेन्टहरु सर्सर्ती हेर्दा, लिङ्क्डइनका प्रयोगकर्ताहरु उत्साहित भएको देखिँदैन ।

सत्य नडेला माइक्रोसफ्टको सिइओ भएसँगै, माइक्रोसफ्टले मोबाइल, वेबमा आफ्नो पुरानो स्थान खोज्दै आएको छ ।  हालैका वर्षहरुमा आइफोन तथा एन्ड्रोइडमा रहेका पपुलर एप्सका साथै एन्ड्रोइड ओएस आदिमा लगानी गर्दै माइक्रोसफ्ट, मोबाइलमा छिरेको छ (माइक्रोसफ्टको आफ्नै मोबाइल सफल हुन सकेको भने छैन) । यसैलाई निरन्तरता दिँदै सोसल मिडिया मार्फत आफ्नो बजार बिस्तार गर्न माइक्रोसफ्टले लिङ्क्डइन किनेको हो । अघिल्लो वर्षमात्रै माइक्रोसफ्टले आफ्नो पहिलो ल्यापटप सर्फेस बुक सार्वजनिक गरेको थियो ।

२०१४ मा फेसबुकले ह्वाट्सएपलाई १९ अर्ब डलरमा खरिद गर्दा जिब्रो टोकिएको थियो । फेसबुक-ह्वाटस्एपलाई डिललाई अब माइक्रोसफ्ट - लिङ्क्डइन डिलले बिर्साउने भएको छ ।

लिङ्क्डइन, अन्य सोसल नेटवर्किङ साइट झैँ, प्रोफेशनलहरुका लागि बनाइएको सोसल नेटवर्क हो । लिङ्कड्इनमा बनाइने प्रोफाइलले कतिपय ठाउँमा 'सिभि/वायोडाटा' कै काम गर्छ । हिजोआज, जागिरका लागि लिङ्क्डइनबाट आवेदन दिने, लिङ्क्डइनबाटै छनौट गर्ने गतिविधि बढिरहेको छ ।