आज असार १५, नेपालीहरु का लागि एउटा पर्व सरह नै हुन्छ । आज दही च्युरा खाने दिन ! सम्भवत: आज कै दिनलाई धान दिवस को रुपमा पनि मनाउने गरिन्छ । तर यसपाली अहिले सम्म पनि वर्षा नलागेकोले, अधिकांश ले धान भने रोप्न पाएका छैनन्, अत: उनीहरुलाई असार १५ पनि खल्लो, खल्लो नै लागेको छ । सिचाइ को सुविधा नहुनु नै, हामी नेपालीहरु को दुर्भाग्य होला । घर मा हुँदा आज दिन मा कम्ति मा पनि, खेत मा गएर एकचोटि हिलो छोइन्थ्यो । हिलो मा चल्नु पनि रमाइलो नै हुन्छ, अझ असार को झरी परिरहेको बखत पानी मा भिज्दै, हिलो मा खेल्दै, बाउसे गर्न निकै नै रमाइलो हुन्थ्यो । भनिन्थ्यो, आज को दिन त राजा रानी ले पनि हिलो छुन्छन् रे, अत: उनीहरुले पनि हिलो खेल्छन् भन्ने थाहा पाएर आफूलाई पनि, कसैगरि पनि हिलो खेल्नुपर्थ्यो आज को दिन मा ! तर अहिले परिस्थिति फरक छ ! :P आज यही असार १५ को मेसो पारेर, २-३ दिन अघि आफ्नो विश्वविद्यालय को वरिपरि खिचेको फोटो पोष्ट गर्दैछु । आशा छ, यी हरिया देखिएका धान खेतहरुले, यहाँहरुलाई पनि, असार १५, रोपाइ, दही च्युरा को सम्झना दिलाउने छ । असार १५ का अवसर मा समस्त नेपाली कृषकहरुलाई हार्दिक शुभकामना !