दाउ थापियो बुर्जामा तर पर्यो झन्डीमा -- लौ आयो लंगुरबुर्जा एन्ड्रोइड मोबाइलमा

सानोछँदा दशैँ अनि तिहार'ताका मामाघर गएको समयमा खोरखोरे (लंगुरबुर्जा) खेल्ने गरिन्थ्यो । नेपालमा लाग्ने हरेक किसिमका मेलामा यो खेल खेलाइन्छ,  अझ दशैँ तिहारको समयमा सहर अनि गाउँ सबैतिर यो खेल खेलाइन्छ, साँच्चै भन्ने हो भने यो एक प्रकारको जुवा नै हो। तर तिहारको समयमा आफ्नो घरपरिवारमा बस्दा मोबाइलबाट यो खेल खेलेर रमाइलो गर्न सकिने भएको हुँदा, खोरखोरे (लंगुरबुर्जा) एन्ड्रोइड एपको बारेमा यो पोस्ट तयार गरिएको हो । यसअघि हामीले अनलाइन बाघचालको बारेमा लेखेका थियौँ।



ठाउँ अनुसार खोरखोरेलाई लंगुरबुर्जा वा झन्डाबुर्जा पनि भन्ने गरिन्छ, जुन खेल प्राय: दशैँ तिहारमा खेल्ने गरिन्छ  । छ वटा 'डाइस' लाई बाल्टिन वा कुनै भाँडो भित्र राखेर हल्लाइन्छ, खेलाडीहरुले आफूले इच्छा गरेको संकेत रोज्छन्, पैसा राख्छन्, त्यसपछि बाल्टिनलाई उठाइन्छ, डाइसमा माथिपट्टि आएका संकेतहरु हेरेर हारजित फैसला गरिन्छ । तल फोटोमा देखाइए झैँ, खोरखोरेमा छ किसिमका संकेत हुन्छन्, जसमा झन्डा, बुर्जा, इट्टा, पान, हुकुम/सुरत, र चिडी पर्छन् ।

तिहारमा खोरखोरे खेल्ने रहर छ, तर आफूसँग डाइस छैन भन्दैमा अब खिन्न हुनुपर्दैन । हाम्रो खोरखोरे खेलको क्रेज देखेर अफलाइन खेलिने खेललाई मोबाइल एप्स डेभ्लपर सुदिप आचार्यले एन्ड्रोइड फोनको लागि निर्माण गरिदिएकाछन् 'खोरखोरे एप' ।


नेपाली प्लेस्टोर - एप्सझोला तथा गुगल प्लेस्टोरमा उपलब्ध खोरखोरे खेल, एन्ड्रोइड मोबाइल/ट्याबलेट मार्फत खेल्न सकिन्छ । मोबाइलमा यो एप खोलेपछि, बाल्टिन आइकन छोएर डाइस हल्लाउनु पर्छ । खेल माथि भनिए जसरी नै खेलिने हो, बाल्टिनमा डाइस हल्लाएर खेल्दा निस्कने आवाज जस्तै आवाज यसबाट आउने भएका कारण, यो साँच्चिकै डाइस नै हल्लाएर खेलेको भान हुन्छ । आवाज बाहेक, मलाई यसमा प्रयोग भएका संकेतका आइकनहरु राम्रा लागे, ठ्याक्कै आफूले सानोछँदा खेलेका डाइसहरु देखियो । आफ्ना साथीभाइ, आफन्तसँग खेल्नको लागि यो निकै रमाइलो एप हो, यसलाई जुवाको रुपमा नभइ रमाइलो खेलको रुपमा खेलेर मनोरञ्जन लिनुहोला ।

तपाईहरु सबैलाई तिहारको हार्दिक मंगलमय शुभकामना ।

➤ Khor Khore (Langur Burja) available on Apps Jhola and Play Store.

0 प्रतिक्रिया :

Post a Comment