पोखरामा स्टार्टअप विकेन्ड


राती ११:३० बजे लेकसाइड पोखरामा आफू बसेको होटलमा बेलुकीको खाना खाँइदैथियो । दुईजना प्रहरी मोटरसाइकलमा आएर, होटलकी दिदीलाई रुखो स्वरमा "अहिलेसम्म होटल किन बन्द गरिनस्, के हुँदैछ याँ" भन्दै हपारे । होटलकी दिदीले भनिन्, "हैन सर अब बन्द गर्न लागेको" । "अहिले फर्केर आउँदा पनि यस्तै रहेछ भने ठिक हुँदैन, छिटो बन्द गर", ती दुई प्रहरीले होटल बन्द गर्न धम्की दिँदै, छेउकै अर्को क्याफेलाई पनि धम्क्याए । होटलकी दिदीले हतार हतार सटर बन्द गरिन, हामीले पनि हतार हतार खाना खायौँ र माथि आफ्नो कोठामा गयौँ । उनीहरुको स्वर यस्तो रुखो थियो कि, जोकोहीलाई सुन्दै पनि रिस उठ्थ्यो । दुई तिन चड्कन लाइदिहाल्नुजस्तो झोक चलेथ्यो, अलिकति नरम भएर बोल्दा तिनीहरुको के जान्थ्यो ?

हामीलाई लेकसाइडका रेष्टुरेन्ट, क्याफे आदि मात्रै ११ बजे बन्दहोला, भित्रका लज र गेष्ट हाउसमा त्यस्ता 'पत्रु' नियम छैनन् होला भन्ने लागेथ्यो । तर नचाहिने कुरोमा चाँहि नियम कडा नै रहेछ ।

बेलुका बिजी बी छिरेर रमाइलो गर्दा गर्दै ११ बजेको पत्तो नै भएन, अझ साथीहरुले आफ्नो "डान्स" स्किलको तारिफ गर्दै "राजेश दाइ"कै जस्तो स्टेप भनेपछि, नउफ्री बस्न पनि सकिएन । अनि होटल पुग्दा ११:३० भयो । साझँमा पनि ब्लग हुँदै ट्विटरबाट चिनजान भएका साथि निशांकसँग एकछिन बसिएको थियो, फेवाताल हेर्दै ।

सेप्टेम्बर २७ देखि २९ (शुक्रबार देखि आइतबार) सम्म हुन गइरहेको 'स्टार्टअप विकेन्ड पोखरा'का सहभागीहरुलाई कार्यक्रमको लागि तयार गराउन हाम्रो पाँच जनाको टोली (आशिष, अनिस, संरक्षण, रितेश) शुक्रबार दिउँसो पोखरा गएको थियो । जिडिजी (Google Developers Group) पोखराले आयोजना गरेको "स्टार्टअप बुटक्याम्प" (GDG Pokhara Startup Weekend BootCamp) को कार्यक्रममा करिब २५ जना पोखराका विद्यार्थीहरुको सहभागिता थियो । काठमाडौँ र पोखरामा गरेको कार्यक्रममा खासै धेरै भिन्नता केही नदेखिएतापनि सहभागिता अलि कम हो कि जस्तो लाग्यो । काठमाडौँमा ह्याकाथन, बारक्याम्प, बुटक्याम्पहरु भइरहने भएपनि पोखरामा भने सम्भवत पहिलो बुटक्याम्प गराइरहेकाथियौँ हामी । काठमाडौँमा हुने जुनसुकै कार्यक्रमहरुमा पनि सँधै एउटै समूह दोहोरिरहेको जस्तो लाग्थ्यो भने पोखरामा चाँही सामाजिक सञ्जालबाट भेटिएका  नयाँ साथीहरुको बाहुल्यता थियो ।
पोखरामा केही साथीहरुसँग कुरा गरिसकेपछि के लाग्यो भने, काठमाडौँमा गरिएका प्रविधी सम्बन्धी कार्यक्रमहरुलाई देशका अन्य शहरहरुमा पनि आयोजना गर्नु जरुरी रहेछ । फोस नेपाल, गुगल डेभ्लपर्स ग्रुप आदिले नेपालका पोखरा, चितवन लगायतका ठाउँमा आफ्ना कार्यक्रमहरु गरेजस्तै, बारक्याम्प, ह्याकाथन आदि कार्यक्रमहरु काठमाडौँमा आयोजना गर्ने साथीहरुले अन्य ठाउँमा कार्यक्रम गर्ने बारे सोच्न जरुरी छ ।


काठमाडौँमा दुईपटक आयोजना भइसकेको स्टार्टअप विकेन्ड अब पोखरामा यही हप्ताको अन्त्यमा आयोजना हुनेछ । स्टार्टअप विकेन्डका सहभागीहरुले आफ्नो बिजनेस आइडियालाई एउटा स्टार्टअपको रुपमा ५४ घन्टाभित्र 'लन्च' (launch) गर्नेछन् । आफैँ केही गर्न चाहनेहरुका लागि स्टार्टअप विकेन्ड आफ्नो "आइडिया भ्यालिडेसन" (Idea Validation) गर्ने राम्रो अवसर हो । स्टार्टअप विकेन्ड पोखरामा सहभागी हुन यहाँ क्लिक गरेर रजिष्ट्रेसन गर्नुहोस्

कार्यक्रममा मैले र आशिष दाइले संयुक्त रुपमा 'स्टार्टअप विकेन्ड' को बारेमा दिएको प्रिजेन्टेसन स्लाइड यहाँ राखेकोछु ।


0 प्रतिक्रिया :

Post a Comment