एक दिन पानी पर्दा… यहाँ ठूलो उत्सव हुन्छ ! #Rain #Nepal

आज फेरि आकाश बाट गडाङ गुडुङ को आवाज आइरहेको छ । काकाकुल को जिवन त पानी परेपनि रहिनै रहन्छ तर पनि पानी पर्ने छाँटकाँट देख्दा मात्रै पनि, मन फुरुङ्ग हुन्छ । पानी को न्यास्रो त्यति सारो लागेको पनि हैन । फागुन महिना नै भएपनि पानी पर्यो भने चिसो बढ्छ, मलाई त्यो चिसो पनि चाहिएको छैन । मलाई पानी मा रुझ्न मन छैन, रुघाखोकी ले सताइहाल्छ । कहिलेकाँही रुझिने भएपनि, झरी मा भिज्दैमा ‘रोमान्टिक फिल’ पनि हुँदैन । अरुबेला गडाङ गुडुङ गरेको सुन्दा नै सातो जाने मलाई  तर आज फेरि आकाशमा कालो बादल मडारिएको देख्दा, गडाङ गुडुङ को आवाज सुन्दा, डर लागेको छैन, मलाई त वेपत्तै खुशी लागेको छ ।

बादल गडाङ गुडुङ गर्न थालेपछि पानी पर्छ नै जस्तो लाग्छ तर पनि ‘भुक्ने कुकुर ले टोक्दैन’ भनिने हुँदा, बादल देख्दै मा र गडाङ गुडुङ सुन्दैमा पानी पर्छ भन्ने त हुँदैन । तर पनि पानी पर्ने कुरा ले रमाइलो लाग्छ, ‘मेन्टोस मोमेन्ट’ भएर दिमाग को बत्ति जले झैँ, केही कुरा झ्वाट्ट सम्झना मा आउँछ । अत: आज पनि कालो बादल देख्ने बित्तिकै  पानी परिदियोस भने झैँ लाग्दैछ ।

कलकारखाना का मजदुर ले हड्ताल गरेको खबर पनि सुनिएन, कुनै कारखाना बन्द गरेको भन्ने पनि सुनिएन, विद्युत (अ)प्राधिकरण ले कुनै सूचना जारी गरेको पनि पढिएन, न त कुनै 'लोडसेडिङ’ को तालिका नै ‘डाउनलोड’ गरियो । तर अस्ति १ दिन पानी पर्दा  ४-५ घन्टा मात्रै आउने बिजुली अचम्मै सँग ले आको-आकै गर्यो । एक सय वर्ष को बिच मा नेपाल मा १ हजार मेगावाट बिजुली सम्म पनि निकाल्न सकिएन तर पोहोरै कुर्सी मा हुँदा प्रधानमन्त्री काम्रेड ले भाषण ठोक्देका थिए, “१० वर्ष भित्र २५ हजार मेगावाट बिजुली उत्पादन गरिन्छ” ।  उनले भाषण ठोकिसकेपछि देशमा दुई वटा नयाँ प्रधानमन्त्री आइसकेका छन् । एउटा ले कामचलाउ सरकार को प्रधानमन्त्री भएर देश चलाइरहे र अहिले आ’का नयाँ प्रधानमन्त्री आफू एक्लै ले देश हाँकिरहेकाछन् ।

पर्चन्न काम्रेड को पाला मा १८ घन्टा लोडसेडिङ भएपछि, उनले खुलामञ्च बाटै सबै को सत्तोसराप गरेका थिए । अनि अहिले झल्नाथ हुने वित्तिकै एकै दिन का लागि सही तर दिनभरि बत्ति आउँदा सबै छक्कै परे । देवी को झापड खा’र पर्धा’नमन्त्री बनेका झल्नाथ ले केही गर्छन् कि भन्ने हामीलाई लाइरा’च भन्नेहरु पनि भेटियो, त्यै भ’र गोप्य स’मति गर्या हो भन्ने पनि भेटियो, कुर्सी बार्गेनिङ गरेर । तर खै कुनै ले नि, बिजुली को बारेमा कुरा गरेको सुनिएन, केबल सम्चाँ’रा पढिन्छ त, फलाना जलविद्दयुत आयोजना को निर्माण कार्य रोकियो, तिलाना कार्यक्रम भनेको भन्दा २ गुणा समयमा पनि सकिएन । अरु त के हुन्थ्यो नेपाली लगानी मा बन्ने भनेर नाक घोक्र्याएको तामाकोशी पनि खै के हुँदैछ पत्तो छैन, अस्ति केही हप्ता अघि कुन मन्त्री र कुन पार्टी ले शिलान्यास गर्ने भन्ने विवाद मै अड्किरा’को छ भन्ने खबर पढ्न पाइयाथ्यो ।

अस्ति १ दिन पानी पर्दा त बिजुली आएको आएकै गर्छ भने, सँधै परे के हुन्थ्यो होला भन्ने लाग्छ । अझ कहिलेकाँही त सबै आयोजना छिट्टै, समय मै बने कति रमाइलो होला भन्ने लाग्छ । Aakar Enjoying rain in front of Kathmandu University Central Library Dhulikhel, Kavre.अस्ति १ दिन पानी पर्दा मोबाइल फोन मज्जा ले ‘फुल’ चार्ज गरियो । त्यो दिन त मोबाइल फोन ले पनि डायल गर्ने बित्तिकै लाग्छु झैँ गर्यो । तर अफसोच त्यो दिन ‘भ्यालेन्टाइन डे’ थिएन । पानी मा पनि एक्कैछिन रुझियो । मोबाइल को सानो स्क्रिन मा फेसबुक खोल्दा खोल्दा दिक्क लागेको बेला, धित मरुन्जेल ठूलो स्क्रिन मा फेसबुक चलाइयो । आफूलाई त फेसबुक नै नयाँ झै लागिरह्यो दिनभरि ! आएका म्यासेज र ईमेलहरु पनि मज्जा ले पढियो, कतिलाई रिप्लाई गरियो, कतिलाई बाल हो भनेर, घरै बसियो । दिनभरि फेसबुक चला’र बसियो, पढ्न पनि गइएन । पढ्न त सँधै गइहालिन्छ नि, बत्ति भन्ने कुरो पो सँधै आउँदैन, बाल हो क्लास, भनेर बसियो । त्यो दिन त टिभी पनि अघाउँजी हेरियो, २-३ वटा नेपाली च्यानल नि थप्पेको रै’छ ।

च्याट मा नि कति मान्छे आ’का हुन् त्यो दिन त ! सबै का फेसबुक र ट्विटर कति चम्केका झैँ देखिने, सबै रङ्गीचङ्गी देखिया’छ भनेर कोही कोही इर्ष्या पनि गर्दै’थे, विदेश तिर बाट ! Smile with tongue out असी रुप्पे तिर्नु पर्ने तर बिजुली चैँ १० रुप्पे को नि बाल्न नपा’को बेला, अकस्मात बत्ति आउँदा सूर्य नै पश्चिम बाट उदा’जसरी यही बिजुली को चर्चा परिचर्चा चलिरह्यो । फोन मा होस या बाटो मा भेट गर्दा, मान्छेहरु “हाम्रो मा त बिजुली आ’को आकै छ, के उदेक भा’को हो” भनेर भन्नेहरु पनि भेटियो । त्यति मात्र काँ’हुनु फेसबुक का स्ट्याटस मा पनि बिजुली कै कुरो, ट्विटर को ट्विट मा पनि बिजुली आ’को कुरो । हाम्रा एकजना साथी भर्खर विदेश गएका उनी त ‘लोडसेडिङ सिक’ पो भएछन् भन्या, अस्ति ट्विटर मा ट्विटिँदै थिए, “हैन क्या हो यस्तो, याँ त बत्ति आ’को आकै गर्छ भन्या” ।

आज पनि पानी पर्ला पर्ला जस्तो स्थिति देख्नासाथ मोबाइल बाटै सही सबैले फेसबुक र ट्विटर मा लेख्न भ्याइसके । अफिस मा भा’काहरु बेलुका घर जाँदा बत्ति होस भन्दैछन् । कोही चाँही लौ यता त पानी पर्यो, बत्ति बाल्न पाइने भो भन्ने लेख्दैछन् भने ट्विटर मा त ‘पर्न लागेको पानी’ र यसले ‘लोडसेडिङ’ मा पार्ने प्रभाव को विषय मा नै ट्विट छलफलहरु चल्न थालिसकेकाछन् । भर्खर एउटा साथी ले पानी पर्यो भन्दै फोन नै गर्यो, सोध्यो “तेरो तिर पानी पर्या छैन” ? “अहिले सम्म परेको छैन, अब पर्छ होला” मैले भने !

फोटो : प्रेम छिरिङ शेर्पा

1 comment :

  1.  हाम्रा एकजना साथी भर्खर विदेश गएका उनी त ‘लोडसेडिङ सिक’ पो भएछन् भन्या, अस्ति ट्विटर मा ट्विटिँदै थिए, “हैन क्या हो यस्तो, याँ त बत्ति आ’को आकै गर्छ भन्या” । :D

    ReplyDelete